د ښځو نړیواله ورځ دې هغو ټولو افغان ښځو ته مبارک وي چې د هېواد دننه تر فشار او تبعیض لاندې ژوند کوي یا له خپل وطن څخه مهاجرې او تبعید شوې دي.
د افغان ښځو مبارزه تل د دموکراسۍ، بشري حقونو او د قانون حاکمیت د تحقق لپاره وه. په تېرو درې نیمو کلونو کې، سره له دې چې د طالبانو د متحجر رژیم له خوا پرې غیرانساني، غیر اسلامي او غیر بشري فشارونه تحمیل شوي، د دې خاورې ښځو په زړورتیا او استقامت سره خپله مبارزه جاري ساتلې ده. دا زړورتیا او په یو دریځ درېدل د افغان ښځو په ویاړلې تاریخ کې یوه زرینه پاڼه ده.
ملي آزادۍ ګوند، چې یو ځوان، ملي او د اسلامي ارزښتونو، بشري حقونو، ټولنیز عدالت، دموکراسۍ او د قانون حاکمیت ته ژمن بنسټ دی، تل د مبارزو او زړورو افغان ښځو ترڅنګ ولاړ دی او د هر ډول تبعیض او بېعدالتۍ په وړاندې به ورسره وي.
موږ په انساني کرامت او حقوقي برابرۍ کلک باور لرو او خپل قاطع ملاتړ له هغو زړورو افغان ښځو اعلانوو چې د طالبانو د ظالم رژیم په وړاندې درېږي. طالبان د منځنیو پېړیو په تفکراتو او د اسلام له نوم څخه په ناوړه استفادې سره، د ټولنې نیمایي برخه له خپلو طبیعي، مدني او انساني حقونو څخه محرومه کړې ده. دې ډلې په خپلو ښځهضد سیاستونو سره، ښځې له تعلیم، کار، ټولنیزو ازادیو او د ژوند په بېلابېلو برخو کې له ونډې اخیستنې محرومې کړې دي.
ملي آزادۍ ګوند، د عدالت د تحقق او د ښځو د حقونو د ترلاسه کولو په لاره کې، دا سیستماتیکه زور زیاتی غندي او د تبعیض او تاوتریخوالي په وړاندې به خپله نه ستړې کېدونکې مبارزه جاري ساتي. موږ باور لرو چې د افغانستان ښځې نه یوازې د دې وضعیت قربانیان نه دي، بلکې د بدلون او آزادۍ مخکښانې دي. له همدې امله، موږ به د هغوی ترڅنګ، د انساني آرمانونو د تحقق، د ښځو د اساسي حقونو د دفاع او د هېواد د استبداد او وروستهپاتېوالي څخه د خلاصون لپاره هڅه وکړو.
موږ له نړیوالې ټولنې، د بشري حقونو له بنسټونو او ټولو آزادۍغوښتونکو څخه غواړو چې د دې ښکاره ظلم په وړاندې چوپ پاتې نه شي او د افغانستان د ښځو د ملاتړ لپاره عملي او مؤثر ګامونه پورته کړي. د ښځو د حقونو لپاره مبارزه، د افغانستان د ټولو خلکو لپاره د آزاد، عادلانه او انساني راتلونکي لپاره مبارزه ده.
د افغانستان د آزادۍ ملي ګوند
